Үр дагавар

Тэр барьж  байсан толио хамаг тэнхээгээрээ ханаруу шидчихээд хага үсрэх чимээтэй нь зэрэг орон дээрээ савж уналаа. Түүний гар хуруу нь чичирээд, нүүр ам нь татвалзан өөрийгөө үзэн ядахын дээдээр үзэн ядаж байв. Үсээ өвдтөл нь зулгааж, гараа самардаж байна.

       Өөртөө үнэхээр гутарчээ.

      - Яагаад, яагаад заавал би гэж ? бурхан минь, та намайг яах гэж ийм царай муутай бүтээв ээ? Миний ингэж тарчлах нь танд сайхан байсан гэж үү? Хөвгүүдийн хэлснээр та, үнэхээр намайг, согтуудаа, зүүн гараараа зурсан юм байна. Тэгээд л би ийм, жартгар ногоон нүд,  том хамар, памбагар уруул, дөрвөлжин толгой, майга хөл, намхан бие мах бодтой төржээ.

Тийм үү ?

Хамгийн гол нь та надад хөмсөг, сормуус зурахаа мартчихаж. Эсвэл бүр хэргээр зураагүй юм байна. Мөн та надад бага ч болов ухаан хайрласангүй. Би хэчнээн хичээв ч хүнд, тэр дундаа багш нартаа үнэлэгдэж чадахгүй юм. Тэгэлгүй ч яах билээ дээ... таны хүссэнээр угаас толгой муу, ой тогтоолт гэж тэг заачихсан юм чинь. Би яагаад зөвхөн танд буруу өгөөд байгааг ойлгож байна уу ? Учир нь:

Манай удамд над шиг ийм царай муутай, ухайн дорой хүн байхгүй ээ. Дээр нь бас сульдаатай гэсэн оноштой гээч. Нэг цагаас илүү ном уншиж  болохгүй. Хэрэв нэг цагаас хором л өнгөрвөл нүд эрээлжлээд ухаан санаа самуурчихна. За тэгээд ч энийг та надаар хэлүүлэлтгүй мэдэж байгаа биз дээ. Би үнэхээр гомдолтой байна.

Хамгийн муухай нь: та жилийн өмнөөс эхлэн надаар бүр ч их тохуу хийх  боллоо. Би таны л зурснаар одоо тэр: ухаалаг, цэвэрхэн ер нь өөгүй сайхан залууд чинь дурлачихаад үхэхийн наагуур шаналаж явна. Тэр намайг нэг нүднийхээ булангаар ч харахгүй гэдгийг мэдэж байж яах гэж ингэж байгаа юм бэ ?

 Би үүнээс хойш ингэж амьдаараа тарчилж чадахгүйээ. Та ойлгож байна уу? чадахгүй нь... миний тэсвэр алдарлаа.

Одоо надад найз нөхөд ч алга. Бүгд л надаар доог тохуу хийн зугаагаа гаргадаг. Учир нь намайг түүнд дурлачихсныг минь сургууль даяар мэдэж, энэ тухай амьтай болгон амныхаа зугааг гарган хөхрөлдөж буйд л байгаа юм. Та л тэдэнд зарласан шүү дээ. Тийм биз дээ ? хэдийгээр би өрөө энэ тухай ангийнхаа охид хэлсэн ч гэсэн энэ бол таны л зурсан зураг. Би бүгдийг, тэр дундаа намайг зүүн гараараа татласан бурхан таныг үзэн ядаж  байна. Тэгээд ч залхаж  байна. Би бол царай муутай, эрэмдэг зэрэмдэг охин.

За би одоо унтлаа. Надад өөр хэлэх үг алга. Ээждээ л үнсүүлэхийг хүснэ.

Ийнхүү охин, бурхан гэгчид буруу өгсөөр халин одлоо. Харин яг энэ үед түүний эцэг нь хөл хүнд эхийг нь архины халуундаа тарчилган зовоож  байлаа...

Чшш! Чимээгүй! Битгий хөдлөөрэй!

Харсны хэрэггүй! Нисчихнэ шүү!

Хоёр ялаа хөөцөлдөн ниснэ. Нисэж нисэж шалан дээр очиод нэг нь нөгөөгийнхөө дээр. Эр эм бололтой. Эдэнд ороо орно гэж байдаг болов уу? Эсвэл...? Гэхдээ амьд л амьтан юм хойно ямар нэг мэдрэмж төрдөг л байж таараа. Эцсийн үр дүн бол үржил шүү дээ. Дахиад л хөөцөлдөөд эхлэв. Эмэгтэй нь дургүй байгаа юм болов уу? Гэхдээ айлгүйтэж байж болох юм. Бүсгүйчүүд дуртайгаа хэлэхгүй. Дүр эсгэдэг. Харин цаанаа бол... Нөгөө хоёр ялаа чинь одоо ширээн дээр, давхар. Тэгснээ цонхны тавцан, хаалганы бариул. Ахиад л хөөцөлдөөн. Атаархмаар ч юм шиг. Үгүй инээдтэй юм байна.

Хэсэг хугацааны дараа ялаа 3 болжээ. Сонин юм аа огт салахгүй. Нэг эгнээнд цуваад л нисээд байх юм. Бие биедээ эрхлэж тоглоод яг л зугаалж яваа аав ээж хүү гурав шиг. Ямар атаархмаар юм бэ? Лав миний мэдэхээр нилээд удаан л гэр бүлээрээ сэлгүүцлээ.  Эд сайхан юмаа. Атаархмаар. Юм идмээр бол гал тогоо, 0-н өрөө рүү орчихно. Бааж шээмээр болвол идэж байхдаа ч амжуулна. Үргэлж агаарт. Хамгийн атаархмаар нь нисэж чаддагт л байгаа юм. Хүссэн цагтаа наранд биеэ шарна. Бас унтаад л. Тэгээд бас юунд ч санаа зовохгүй. Тэгвэл ялаа, галзуурсан тэнэг хүн хоёр яг адил юм байна. Байхгүй бол баярлана уу гэхээс хэн ч үгүйлэхгүй. Хэнд ч хэрэггүй.

 Ялаа болохгүй. 

Дүү маань нөгөө өрөөнөөс хөмсгөө зангидчихсан гартаа алууртай:

- Муусайн ялаанууд хүн унтуулахгүй юм. Хоёрыг алчихлаа. Ахиад байна уу гэсээр орж ирэв.

Би хурдхан, арьсан дээр минь ийш тийш урд хоёр хөлөө үрчин маадгар алхах ялааг заалаа. Уг нь ирвэгнээд ямар таатай байсан гээч.

Ялаа үхжээ. Харин би, нэгэн гэр бүл гэж бодов. Гэхдээ харамсахгүй байна. Гэвч  нисмээр ч юм шиг.

Аварга замын голоор алхана. Салхилж яваа бололтой. Ард нь эвдэрхий гүүр. 25 эсвэл 18, 19-тэй ч байж болох нэг  охин аваргыг гүйцэж ирээд :

- Сайн байна уу?

- Сайн, сайн байна уу? Мэндлэж сурсан нь илт. Аварга охинтой, утсаар ярингаа ингэж мэндэлчихээд л урагшлав. Охин хоцорлоо. Өөрөөсөө илүү хүн бүртэй бид дотносох хүсэлтэй байдаг. Үүнийг  тэд л мэдэрдэг биз.

Хэсэг хугацаа өнгөрсөн боловч охин аваргын яг ард нь явсаар л. Аваргад эвгүй санагдаж эхлэв. Нэг хурдан, нэг удаан, баруун, дараа нь зүүн тийшээ.

Гэнэт охин түс хийтэл инээд алдаад :

- Би таны шалдан байхыг харсан гэлээ. Аварга гэнэт сонсогдсон энэ инээднээс бага зэрэг цочисхийснээ:

-Аан..?

Инээдээ барьж ядан жуумганах охин:

-Би таны шалдан биеийг харсан гэж дахин хэлээд учиргүй хөхрөв.

Аварга гайхлаа. Юу...? хэзээ харсан юм бол оо...? харсан бол цонхоор л харсан байх. Хөшиг нээлттэй байсан юм байх даа. Үгүй ингэхэд би хэзээ гэртээ шалдан байсан гэж? гэх зэргээр түрхэн зуур бөөн бөөн бодлууд нисэж ирээд мөргөлдөж эхлэв. Тэгээд охины зүг хараад ахиад л:

-Аан...? / цэвэрхэн л хувцастай юм байна  лав тэнэмэл биш /

- Санахгүй байна гэж үү? саяхан шав шалдан, үгүй ээ зөвхөн улаан хүрэн цээживч бас нарийн ацнаас өөр хувцасгүй нэг шалдан ахтай зууралдчихаад байсан биз дээ?

Аварга бүр гайхаж орхив. Олны танил байх хэцүү л дээ. Алхам бүрээ хянана. Үргэлж бусдын харцанд манаатай. Хүмүүс аваргаас янз бүрийн л юм асуудаг ч энэ охин шиг өөрийг нь хэлэх үггүй болгож байсан удаагүй. Үгүй ээ, нэг тиймэрхүү явдал болсон юм байна.

Тэрээр аварга болоод удаагүй бас залуу ч байсан. Хэдэн нөхөдтэйгөө тэр үедээ л хамгийн тансагт тооцогдох томоохон зочид буудлын дээд давхрын цэнгээний газар шар айраг шимээд сууж байлаа. Хүмүүс өөрийнхөө хүндэлдэг аваргатай нэг орчинд байгаадаа баярлан олзуурхаж найрсгаар мэндлэцгээн мутрыг нь халуун дулаан үгсийн хамт хүртэж байцгаав. Аварга ч нэг их цааргалсангүй. Дуртай байсан. Гэтэл 30 орчим насны цэвэрхэн залуу ойртож ирээд амьсгаадан, аваргын чихэнд:

-Та надад туслаач. Гараад уулзаатахъя тэгэх үү?

Гайхсан аварга залуу руу нэг харснаа согтуу нь ч гайгүй л юм шиг байна. туслаач гэхийг бодоход хүнтэй зодолдуулах гээд байгаа юм болов уу? гэж бодсноо:

-Юу гэнэ ээ? Аан.. энд хэлчих хэлчих гэхэд залуу, уг нь энд хэлмээргүй л байна, гээд эргэн тойрноо нухацтай хараад

-за яах вэ гэснээ ахиад л чихэнд нь:

-Би бүх мөнгийг нь төлчихсөн. Ёстой нэг өөлөх юмгүй сайхан амьтан байгаа. Би гаднаас нь түгжчихээд ирлээ. Тэгсэн тэр, таныг өрөөндөө авчираад хамт  дээд тал нь хагас цаг суух юм бол надад бүх үйлчилгээг үзүүлнэ гээд байх юм. Гэхдээ мэдээж таны дараа шүү дээ. Намайг чадахгүй гэж басаад байгаа юмаа. Та тусал л даа. Танд ч гэсэн сайхан байх болно доо. Эр улс юуг нь нуух вэ дээ гээд мөрөн дээр нь алгадав. Тэгснээ чихэнд нь бүр ойртож:

-Дэлхийн хамгийн царайлаг ард түмний нэг шүү гэж хэлээд нүдээ жартайлгалаа. Аварга шууд ойлгосонгүй тул тоглоод байгаа юм болов уу гэж бодов. Гэтэл залууд огтхон ч тийм шинж алга. Хэсэгхэн зуур алмайрсан аварга гэнэт:

- Өө үгүй, үгүй. Уучлаарай, хөгшин нь одоо явлаа гээд шууд л гараад явж билээ. Харин дараа нь / дэлхийн хамгийн царайлаг сайхан ард түмэн бол орос биз дээ / гэж бодсон юм.

Гэнэт аваргын тохойноос зөөлөн татах нь мэдрэгдэв. Энэ удаа охин их  төв царайтай болсон байлаа.

-Аварга аа, гэхдээ таны шалдан байхыг ганцхан би ч харсан юм биш л дээ.Тэнд байсан бүх л хүн харсан. Тэгээд ч таны ойр хавийнхан бүгдээрээ л тийм байсан юм чинь та санаа зовох хэргэгүй дээ. Зүгээр л..., би анх удаа тийм олон шалдан эрэгтэй хүмүүсийг харсан болоод л...

Огт тоглосон шинжгүй яриад байгаа охиныг аварга галзуу юм болов уу гэж бодов. Тэгээд хурдхан салахын түүс болж ямар ч шаардлагагүй хэрнээ гэрлүүгээ залгалаа.

-Байна уу? Аан аав нь байна.

-Яасан та юмаа мартчихсан юм уу?

-Үгүй ээ, ээж нь байна уу?

-Юу гэнэ ээ, ээж Хөвсөл яваад бараг сар болж байна шүү дээ. Та чинь...

Дийд дийд дийд

Ахиад л тохойноос. Ямар хэцүү, ядаргаатай юм бэ? Яах гээд байгаа юм бол оо? гэж бодоод аварга ахиад юу ярих бол гэхээс яс нь хавтайж байв.

-Би танд төвөг удсан бол уучлаарай. Зүгээр л танд туслах гэсэн юм гэснээ арай хөгжилтэйгөөр:

-Уг нь нь та тэр цээживч ац хоёртоо тохируулаад өнгө дагуу углааш өмсчихвөл илүү сонин бас хамгийн моодны аварга болно доо.

-Ээ бурхан минь. Хөөрхий өвчтэй юм байна гэж бат итгэсэн аварга хажууд нь дөнгөж тормоз дарсан машиныхаа хаалгыг шувт татан тас хийтэл хаав.

Жолооч нь гайхжээ.

odoogoos 2 jil hagasiin omno bichij bsnaa genet olov. hen negen namaig jujig bichij uzeech geheer n l turshij bsn hereg.   ugaasa nz nohod bagatai bi gedeg hun ene talaar neg ih saihan setgegdeltei yavdgui  l de.

Биенийхээ төлөө үхэхээс ч буцахгүй гэлцэх эдгээр найз дөрвөн бүсгүйчүүд энэ өглөө гэр орон, аав ээж, нөхөр сүүдэр, үр хүүхэд гээд ер эргэн тойрны бүхнээсээ хүчээр шахуу чөлөө аван хэд хоног Азийн орнуудаар аялахаар болжээ. Тэд хар багын л найзууд бөгөөд өдий гуч хүрсэн хэдий ч уулзалдахаараа дүрсгүйтдэг нь хэвээрээ. Уг нь урьд, дөрөв маань зургаа байсан л даа. Харамсалтай нь хоёр нь дөрвийнхөө шаардлагад хүрээгүй ч юм уу эсвэл өөрсдөө явсан ч юм уу мэдэхгүй одоо бол дөрвүүлээ л байна. Гэхдээ хөөрхий тэр 2 ядуухан гэр бүлд төрж өссөн     гэсэн.

Дөрөв маань онгоц хөлөслөжээ. Сүүлийн хэдэн сар уулзаагүй мөн бүхий л дарамтаасаа саллаа хэмээн баярлалдах тэд багынхаа хөгжилтэй явдлуудаас дурсацгаана. Уг нь нэг их дарамт үгүй л дээ. Тэд амьдалд л байна.

С- Бид нар хөдөлгөөнтэй хүүхдүүд байсан тиймээ? Санаж байгаа биз дээ? 6-р ангид байсан даа. Анх зургуулаа Кал гэдэг дарснаас хоёр шилийг аваад гүүрэн дээр очиж уусан аа? Орой нь бүгд гэртээ орж чадахгүй айгаад л бас А, Б хоёр маш их бөөлжсөн.

М- Санаж байна, санаж байна. Б-г согтсоныг ээж нь мэдчихээд бид нарыг хөөж байгаад л барьж авсан шүү дээ. Уг нь хэнд ч харагдалгүй нэг харанхуй орцонд орсон тийм ээ? Тэгсэн дүү нь зааж өгөөд баригдчихсан. Сүүлд  ээж нь- Тэр орцоор ормогц л архины эхүүн үнэр сэнгэнэж байсан гэж хэлсэн гэнэ лээ.

А- Хи хи хи ямар аймаар юм бэ? Би лав тэгэхэд уугаагүй шүү.

Ш- За болиорой. Харин ч чи л тэгэхэд хамгийн их согтоод бөөлжисөндөө хутгалдчихсан байсан.

С, А, Ш, М- ха ха ха, хи хи хи, хо хо хо, хэ хэ хэ

С- Ёо үхлээ үхлээ. Тэр үед ч бид нар тэр Кал-г байнга уудаг байсан байх. Бас нэг уучихаад О-гийн хайртай хөвгүүн дээр очиж тэнэг тэнэг юм яриагүй юу? Манай О дажгүй охин, чамд хайртай, сэтгэлийг нь бодоорой энэ тэр гээд л...

А- Хи хи хи аймаар байсан байнаа. Тэгэж их учирлаж гуйгаад байхад хүртэл тэр хүүхэд О-той найзлаагүй шүү дээ. О ч өөрөө царай муутай байсан даа. Хэ хэ хэ

Ш- Ер нь одоо О, Б хоёр хаана байдаг бол оо? Нэг уулзах юм сан.

М- Бид нар ер нь яагаад салчихсан билээ? Бага байсан болохоор нэг жижигхээн маргаанаас болсон шиг санагдаад байх юм.

А- Яагаав...?  Ер нь тэр 2 үргэлж л бид дөрвөөр даалгадаг байсан биз дээ?

М- За за тэр яах вэ! Амралтаа юугаар эхлэх вэ? Онгоцон дотор байгаагаа бодолцоно шүү. Оргилуун дарс болно биз дээ?

С- Бололгүй яах вэ дээ. Үйлчлэгч ээ! Оргилуун дарснаасаа хамгийн сайныг нь аваад ирээч.

    Нэг онгоцонд дөрвүүлхнээ явахаар уйтгартай юм аа. Уг нь эрчүүд байсан бол... хи хи хи.

М- Хи хи хи

Ш- Манай нөхөр ч намайг явуулчихаад ёстой нэг дураараа дургих байх даа. Та нартай явна гэсэн чинь уухайн тас л зөвшөөрч байна лээ.

    Хэд хоног араас нь үглэж, утасдах хүнгүй...

А- Чи ер нь нөхрөө яагаад ингэтэл нь давраагаад байдаг юм бэ? Хойноос нь хөлөө хугалчих гээд л гүйгээд байдаг. Гэтэл цаад нэг юм чинь чамд ганц удаа ч болов үнэн сэтгэлээсээ хандаж байсан уу? Миний найз битгий ингэж бай. Сайхан хүүхэн гэдгээ мэдрүүлэх хэрэгтэй шүү дээ. Эсвэл салж л орхиоч. Танай нөхрийг харахаар бүр дургүй хүрээд байдаг юм.

Ш- Өдий 30 хүртлээ тэсчихээд одоо ч... Тэгээд ч надаас муу ханьтай хүүхнүүд бишгүй л байна. Охидууд ч тэрний бараг цуглуулга нь юм чинь дээ.

А- Би лав салах л байсан. Ямар үзээгүй юм биш. Гурав дахь нь л болно биз.

С- Харин тийм. Хи хи хи

М- Манайх болохоор үргэлж зүүгдээд л ядаргаатай. Цаанаа л нэг хартай. Та 3-тай явна гэсэн чинь хүртэл цуг явна гэсэн гээд бод доо. Тэнэг. Арай гэж л аргалсан. Нэг салсан дээрээ ч юм юм үзнэ шүү...

С- Дөрвүүлээ Тай-гаас залуу авч үзэхүү?

А- Хи хи хи тэндээс авбал эр эм нь мэдэгдэхгүй биз, сэжиг хүрмээр юм. Тэгснээс Хятад, Со залуучууд дажгүй биз дээ.

Ш- Тэгэж байгаад өвчин авчихвал тэрнээсээ эс юм болох байх даа. Хэ хэ хэ

А- За юу гэж дээ? Бэлгэвч гэж нэг сайхан юм байхад.

Сайхан амралтын төлөө.

Дуулна.

Хамаатнаас дутуугүй андууд билээ

Ханилснаас дутуугүй найзууд билээ.

С- Хүүхнүүдээ! Би та нартаа хайртай шүү. Ийм сайхан найз нартайдаа би үнэхээр бахархдаг.

Хамаатнаас дутуугүй андууд билээ.

Ханилснаас дутуугүй найзууд билээ.

Гэнэт онгоц дайвалзав. Нөгөө 4 сандралдан гарт дайралдсанаа барьж аваад бие биерүүгээ харлаа. Шалан дээр хагарсан хундага.

Үйлчлэгч: Та бүхэн суудалдаа тайван сууцгаана уу. Бүсээ хийхээ мартуузай. Бид одоо бага зэрэг хүчтэй салхи сөрөх гэж байна. Удахгүй аялалаа тайван үргэлжлүүлэх болно оо.

М- Ёо ямар аймаар юм бэ? Гайгүй байгаа.

Ш- Их л тайван ярьж байна шүү дээ. Зүгээр биз.

Онгоц бүр хүчтэй дайвалзаж эхэллээ. Шилтэй дарс, өлгөөтэй малгай цув гээд л ер ил байсан бүгд унаж эхлэв. Хэн нэгэн нь бөөлжиөд хамаг хувцасаа завааруулж байгаа харагдана. Дөрвөн бүсгүй нүдээ тас аниад суудалдаа гүн шигдэн бариулаасаа тас зуурчээ. Аймаар энэ дайвалзаан улам л нэмэгдэхээс намжих шинжгүй.

 Хэсэг хугацаа.

Бараг 90% хазайж байлаа. Үйлчлэгч таг чиг.

А- Юу болоод байнаа? Хөөе, үйлчлэгч ээ, нэг юм хэлээдэхээч. / суудлаасаа тас зуурсан хэвээр нүдээ аниад хашгирч байна /

Чадлаараа хашгирсан А-г хэн ч сонссонгүй. Онгоц үнэхээр хоёр тийш шидэгдээд байгаа мэт.

10 эсвэл 20-д хором.

Таг чиг.

 Бүгдийн нүдний өмнүүр амьдрал нь дурайна.

Ш нөхөртэйгөө танилцаж байгаа, А анх хүүхэдтэй болчихоод баярлаж байсан нь, М нөхөртэйгөө зурагт үзээд сууж байгаагаа гээд л үргэлжилнэ. Гэнэт онгоцны дайвалзаан багасаж эхлэх нь тэр.Удалгүй хэдэн хормын дараа бүр нам гүм боллоо. Гэвч хэн ч үл дуугарна. Найман нүд л бүхээгээр айн хэсүүчилнэ. Гэнэт энэ нам гүмийг эвдэн нисгэгчийн хоолой цуурайтав. Хатагтай нараа та нараас хүлцэл өчье. Бид унаж байна.

А- Ээ бурхан минь сая юу гэчихэв ээ? Одоо зүгээр л байна шүү дээ. Та нар сонссон уу? Муу хогийн новш минь чамайг ална шүү. Бид нараар тоглоод багаа юм уу чи?

Гэвч онгоц аажмаар унаж байгаа нь тэд нарт мэдрэгдэх шиг.

С- Харин тийм. Тэртээ тэргүй унаж байгаа юм бол чи наад өрөөнөөсөө гараад ир. Бид нар бүх даатгалаа төлчихсөн. Гараад ир новш оо. / хаалгыг нь нүднэ/.

Ш- Гэнэт хүчтэй салхи гарна гэж байдаг л юм байх даа.

М- ииииииииииииий уйлж эхлэв. Тэгвэл надад хэр хугацаа үлдсэн гэж? Хэрэггүй л энэ гуравтай явж. Муу азгүй амьтад.

С- Чи үхсэндээ уйлаад байгаа юм бэ? Хэн чамайг яв гэсэн гэж? Чи өөрөө л явсан биз дээ.

М- Тэгээд... Та нараас өөр хүнтэй явсан бол ийм юм болохгүй байсан. Үргэлж бид нараас дээгүүр гарах гэж зүтгэдэг бас юу ч мэдэхгүй байж худлаа онгирч хүнийг далдуур муулдаг А та хоёрыг чөтгөр авах гээд л Ш бид 2-г дайруулчихлаа. Муу гичийнүүд. Та 2-г би угаасаа үзэн яддаг байсан. Хэзээ ч найз нар гэж бодож байгаагүй.

А- Тэнэг минь юу гээд байгаа юм бэ? Чи тэгвэл ямар ч өөгүй сайн хүн юм биз дээ? Одоо хүртэл Ш-н нөхөртэй унтдаг чинь үнэн шүү дээ.

М- Тэрэндээ тулах юм бол та 2 ч гэсэн зүгээр байгаагүй дээ. Гаднаа сайхан царайлсан чамайг хамгийн эхэнд нь орхисон биз дээ. Чи хойноос нь үхэн хатан уйлаад гуйснаа санаж байна уу? С ч яах вэ төрөлхийн янхан болохоороо мөнгөгүй үедээ ирж унтаад л явдаг байсан гэсэн.

Ш- Та нар хүртэл... / гайхаж бас үхтлээ гомдов/ Ёстой хэлэх ч үг алга.

С- Янхан гэнэ ээ? Чам шиг би бөгсөө худалдаж амьдардаггүй байсан шүү. Таалагдсан нэгэнтэйгээ жаргах чинь янхадалт юум уу? Би хэзээ ч Ш-н нөхрөөс мөнгө авч байгаагүй. Яагаад гэвэл тэр миний анхны хайр байсан юм. Жинхэнэ янхан бол чи шүү дээ мал аа.

Ш- Би та нарыг арай ч ийм гэж бодоогүй юм даа. Та нар намайг тэгэж чадаж байсан бол би ч гэсэн зүгээр байгаагүй шүү гэдгээ харин одоо, нэгэнт үхэх гэж байгаагаас хойш хэлчихье. А, би чамайг үзэн яддаг байсан. Чиний ажил төрөл сайн байдаг болохоор их атаархдаг байж билээ. Тэгээд л чамайг сонирхож байсан бүх эрчүүдэд эвтэйхэн муулдаг байсан юм за юу. Хохь чинь.Өдий хүртэл ханиа олохгүй зовж яваад чинь би тусалсан юм. Харин М-ээ чиний алдсан тэр 5 сая долларыг би хулгайлсныг чи мэдсэн үү? Хи хи хи С чамайг бол би мэдэж байсан. Манай нөхөр та 2-г бие биедээ хайртай байсныг чинь мэддэг байсан ч би голоор чинь орж албаар хүүхэдтэй болоод  суучихсан гэдгийг чи одоо хүртэл мэдээгүй байгаа биз дээ ха ха ха

Биенээ үзэн ядах дөрвөн хүүхэн юу юугүй босож ирээд үсдэлцэх нь...

Гэнэт нисгэгчийн хоолой- Та бүхнийг сандаргасандаа хүлцэл өчье. Агаарын байдал сайжирч байна. Бид аажмаар дээшилж байгаа тул та бүхнээс тайван байж суудалдаа суухыг хүсье.

Эргэн тойрон нам гүм. Нэг нь бөөлжисөө зөөлөн арчих нь сонсогдоно.

                                                                                2005 оны 9 дүгээр сар 2

Нэг юм бичмээр байна. Харин юу вэ? Мэдэхгүй ээ. Би хоосорчихсон юм болов уу? Гэхдээ ойлгож байна аа. 

 Тэгэхээр чухамдаа би бол хоосон хөгийн амьтан. Ямар нэг юмнаас хуулахыг хүсээд байгаа юм бол  бичээд яах юм бэ? 

Хэдий болтол ийм түгжигдмэл, уйтгартай, нэгэн хэвийн амьдрал намайг бүрхэх бол? Ийм амьдралд хүн нэг бол бясалгасаар их гэгээрнэ эсвэл бүр доройтож унтарна. Тэгвэл би яаж байна вэ? Энэ үед намайг ганц баясгадаг нь ном

Нэг юм орж ирлээ. Эмээ.

Цагаан саарал өнгөтэй цоо шинэ бенз Туул голын эргээр давхина. Бараг 70 км/цаг. Гэнэт хүчтэй тормоз. Ямар залуу гарч ирэх бол?

- Чинээлэг айлын 18-20 насны дэнжин хөвгүүн.

- Өөрийн гэсэн ажил төрөлтэй ажил хэрэгч байрын зальтай залуу

- Саяхан танилцсан тэнэгхэн царайлаг охиноо хажуудаа суулгаж түүндээ баярхаж яваа онгироо залуу

- Ихийг бүтээгч эр

- Баян авгай

Хэ хэ аль нь ч биш.  Ихээр бодоход л 65-70 орчим насны эмгэн, 10-д насны жаалхүү.

Эмгэн машин дотроо оймс гутлаа тайлж байгаа харагдана. Нимгэн майк, богино өмдтэй хөл нүцгэн эмээ.

Хүү түрүүлж гүйсээр замын цаадах том том чулуутай эгц уулын хормойд зогсов. Эмээ шууд хойноос нь алхлаа. Нэг харсан эмээ хүү 2 нөгөө эгц уул өөд авирч байх нь тэр. Ээ, хөгшин хүн уначих вий дээ. Тэр айхтар эгц газар руу яах гэж мацаад байгаа юм бол оо? Хөөх нөгөө эмээ чинь гутлаа өмсөөгүй хөл нүцгэн хэвээрээ байна ш дээ.

Мацаад л мацаад л...

Эмээ түрүүнд нь. Хүүд их л залхуутай бас хэцүү байгаа бололтой.

Эмээ эргэж хараад хүүрүү даллав. Хүү дуртай дургүй мөлхөнө. Эмээ ганцаараа цааш мацлаа. Бэлээс харж байгаа надад эмээ 90% эгц өөд мацаад байх шиг л аймшигтай санагдана. Ядаж хөл нүцгэн бас хөгшин.

Эмээ буцаад бууж явна. Хөл доороос нь уулын хатуу чулуу, шороо өвс гээд нухаж өвтгөх юм мундахгүй. Эсвэл эмээ хөл нүцгэн явсаар байгаад ул нь ширэм болчихсон юм болов уу? Бас гулгах гээд хэцүү байдаггүй л юм байх даа. Одоо бодоход мацахаасаа уруудах нь хувь илүү хэцүү байдаг юм байна. Ий уначих вий дээ.

Ээ, тэр хөл алдаад...

Дээрээс өнхрөөд эсвэл гулгаад ороод ирвэл би яаж ч чадахгүй дээ. Газар хорогдох тусам айдас түгшүүр нэмэгдэнэ. Гэвч эмээгийн өмнөөс би л хий дэмий зовоод байх шиг. Эмээ бол дажгүй.

Бүр хормойд нь явна. Хамгийн сүүлийн том чулуун дээрээс эмээ хүүгээрээ түшүүлж байгаад үсрээд буучихлаа. Хэлэх ч үг алга. Манай эмээ бол халтирч унана гээд өвөл ганцаараа орцны үүдэнд гарч суухаасаа ч айдаг. Гэтэл энэ эмээ тэс өөр юмаа. Одоо машинруугаа хурдан хурдан алхалж явна.

Цагаан саарал өнгөтэй сүүлийн үеийн бенз.

                                                                                                   2005 on

                                           2.   25-тын эргэцүүлэл

Хүн бүр сэтгэл дотрохоо чин үнэнээр нь гаргах юум бол ямар ч амьдрал бүтэхгүй. Учир нь чин үнэн гэдэг сонсоход тийм ч тааламжтай зүйл биш учраас тэр. Гүн. Аюурзана

Хүү минь өвдлөө. Хамгийн ихээр би шанална. Учир нь хүү минь өвдөж байгаагаа л мэдэхээс бусдыг анзаарах чадваргүй дэндүү жижиг.

Би хүүдээ санаа зовоод тэр үү? Эсвэл надад элдэв хүндрэл учраад байгаа тул энэ байдлаас зугтаах гэж тэр үү ямар ч л байсан би хүүгээ эдгээх гэж байдгаараа адгана. Хүнд аав, ээж, хань нөхөр, мөнгө төгрөг, сайхан гэр орон хэрэгтэй ч тэд үнэндээ хуурамч. Надад хамгийн үнэтэй нь миний эрүүл мэнд. Гэхдээ хүн заримдаа өөрийгөө ч хуурдаг. Ёстой тэнэг.

... Би энэ ажлыг яг маргаашаас эхлэж хийнэ гэж өөртөө амлана. Маргааш болоход нөгөөдөр хэмээн хойшлуулна. Энэ бол зүгээр л наад захын жишээ. Өөрийгөө ч хуурдаг энэ хорвоод тэгэхээр үнэн гэж алга.

“Үнэнээр явбал үхэр тэргээр туулайг ч гүйцнэ” гэж манай эртний зүйр үг бий. Тэд лав л надаас өмнө үнэн гэж байхгүй гэдгийг мэдэж байжээ. Арга ч үгүй. Тэд намайг бодвол настай. Хүн амьдрал үзэж нас нэмэх тусмаа ухааждаг юум чинь. Гэхдээ бас зальтай.  Эдгээр үгсийг зарим хэнээтнүүд шууд утгаар нь ойлгон өөрийнхөөрөө тайлбарлах гэж зүтгэхийг ч бас бодолцжээ. Гэвч тэд зөвхөн аман дээрээ л ярихаас амьдрал дээрээ гутранга надаас ч бусармагийг хийдэг гэдэгтэй би санал нэг.

Би тэргэндээ дэлхийн хамгийн хурдан гэсэн үхрийг хөллөөд явж байна. Гэнэт нүдний үзүүрт туулай! Дээрх зүйр үгийг санаад туулайн араас үхэртээ ташуур өглөө. Туулай ганц харайгаад л алга болсон нь мэдээж. Үхэр тэрэгтэй би чинь туулайг гүйцэх нь бүү хэл ядаж зэрэгцэж ч чадсангүй. Инээдтэй юум. Тэгэхээр би өдий хүртлээ хуурамчаар амьдарчээ. Гэвч үүнийгээ мэдсэн нь яамай даа.

Үнэн гэж алга. Үнэн байгаад, тэрийг хүн мэдвэл энэ нь түүний хувьд хамгийн хатуу шийтгэл болох биз. Бүх юум хуурамч. Алхам тутамдаа бие биенээ хуурна. Байдаг чадлаараа хашгирмаар юум. Гэвч зохцох л хэрэгтэй. Үгүй бол би өөрөө үхэлд яарах болно.

Учир нь чин үнэн үг хүнийг гомдоон уу гэхээс баярлуулдаггүй.

         Тэгэхээр... энэ нийгэмд...

1.Байгаа орчиндоо зохицож, хүн хүнд нь тааруулж, бага зэрэг зальтай тэгээд муу санаатай-ухаантай явах хэрэгтэй юум байна. Ер нь их ярихгүй байвал зүгээр! Бас цаг нь болоогүй бол хэнд ч юу ч битгий амла! Хэрвээ чи тухайн нөхцлөөс шалтгаалан амалсандаа хүрч чадахгүй болчихвол үүнээс муу зүйл гэж үгүй.Харин тэрэн дор санаж явахад болно гэдэг үгийг бодож яв! Хүнийг гэнэт баярлуулах үнэхээр сайхан.

2. Хэн ч чамд туслах ёсгүй. Энэ нь хэн нэгэн сайн санаатан чамд туслаж болох авч чи бусдын тусламжийг хүлээх ёсгүй гэсэн үг. Өчүүхэн жижиг зүйл дээр ч бусдын тусламжийг бүү горил. Энэ нь хожим чамд л хэрэгтэй бөгөөд чи хэр эрт биеэ даана тэр хэрээрээ эрт өндөрлөгт хүрнэ. Бага залуугийн бардам зан их ирээдүйн эхлэл гэдэг сайхан үг шүү.

3. Хүний амьдрал маш урт бас үнэхээр богино.

Таны амьдрал маш урт учраас хүнд үргэлж боломжоороо үнэн сэтгэлээсээ туслаж яв. Та хэд ч наслаж мэднэ. 100, 200 Үхэхгүй удаад л байгаа бол та муу хүн гэсэн үг.

Харин амьдрал үнэхээр богино учраас хийх гэснээ алгуурлалгүй яг одоо эхэл. Та хэзээ ч үхэж мэднэ. Ялангуяа өөрийгөө сайн хүн гэж боддог бол... Энэ амьдралаа ялааны амьдралаар өнгөрүүлмээргүй байгаа биз дээ?

3. Хүний амьдралд хамгийн чухал нь зорилго . Зорилгоо зөв тодорхойлоод тэмц. Ядаж л амьдрал чинь сонирхолтой болно.

Гэх мэтээр их зүйл бодогдоно. Бодох тусам өчүүхэн зүйл дээр ч үл ойлгогдох, хариулж эс чадах асуултууд. Би хөгшрөх тусмаа нялхраад байх шиг. Учир нь түм буман асуулт толгойд. Ертөнцийн хамгийн энгийнийг ч мэдэхгүй надад алхам тутамд асуулт тулгарна.

 Энэ юу гэсэн үг вэ?

 Хүн номыг яах гэж уншдаг юум бол...? гэх мэт...

Ухаантай хүн гэгээрэх гэж.

Тэнэг хүн цаг нөхцөөхийн тул уншдаг юм гэж.-аав хэлэв. Харин би ямар хүнийг ухаантай гээд байгааг ч мөн гэгээрэх ямар хэрэгтэйг ч  ойлгохгүй л байна.

Гэтэл би хүний тархиар, тэдний сэтгэсэнээр сэтгэж зүгээр л сайхан хуулж байх шиг. Ямар ч ном надад шпиргалк шиг л санагддаг.